Week: 3 tot 8 Februarie 2014:

 

Besprekingsvrae en antwoorde vir omgeegroepe na aanleiding van die preek op 2 Februarie 2014:

Lees saam:          Openbaring 21: 9 tot 14                Tema:   Die Godstad: gebou met Aantrekkingskrag

“Die stad het die heerlikheid van God ...” (Openbaring 21:11a)

 Besprekingsvrae:

1.       Vertel vir mekaar: Wat sou jy graag wil hê dat die Gees in jou lewe moet verander? Wat laat jou minderwaardig voel? Hoe kan jy verander dat jy meer geliefd voel?

2.       Wat het hierdie veranderinge in ons lewe te doen met die Godstad?

3.       Hoe word ons verander om al hoe meer te lewe soos wat Hy wil hê ons behoort te lewe?

4.       Wat kan ons verwag van die Gees-gedrewe bouwerk in ons?

5.       Wat is die simboliese betekenis dat daar drie poorte in elke van die vier kante van die Godstad is?

 6.       Watter vereistes word in Openbaring 21 gegee om inwoner van die Godstad te wees?

7.       Waarvoor is daar engele by elk van die 12 poorte?

8.       Wat kan ek van my kant af doen om meer geliefd te wees en op so ‘n wyse by te dra tot die aanskoulikheid van die Godstad?

 Moontlike antwoorde:  (slegs vir die oë van die besprekingsleier)

1.  Hierdie is vrae wat gedurig iewers in ons elkeen leef. Dis tog lekker om mooi dinge oor jouself te hoor. Dis tog sinvol om goed met ander mense oor die weg te kom omdat hulle jou aangenaam belewe. Dit is lekker om goed oor jouself te voel.
2. “Ons lewe deur die Gees; laat die Gees nou ook ons gedrag bepaal.” (Galasiërs 5:25) Die Een wat in elke Jesus-mens is, is besig met die bouwerk in jou. En doel met sy Gees-werk in jou, is sy eie eer.
3. In Openbaring 21 lees ons hoe beeldskoon en pragtig en luuks die stad beskrywe word. Dit is simbolies God se doel met elkeen van ons: beeldskoon van binne en buite, pragtige unieke persoonlikheid en al die mooiste eienskappe om almal rondom ons se lewens te verryk. Hy herbou jou lewe sodat jy al hoe meer “na Hom lyk”.

4. Hierdie Gees-gedrewe bouwerk hou nooit op nie. Tog is dit ons geleentheid om net al hoe meer in Hom te ontdek waarmee Hy in ons besig is, naamlik om ons totaal en al oor te maak en volledig nuut te laat lewe. “... sal die Gees julle op ‘n splinternuwe manier laat leef.” (Romeine 8:10, Die Boodskap) En hoe langer en hoe meer word elke Jesus-mens so aantreklik en aanloklik dat ander ook soos ons wil wees. Die mooi en die goeie in ons, wat slegs deur die Gees se werk sigbaar word, lok ander vreemdelinge nader aan die Godstad om ook inwoners te word.

5. Hiervoor is die baie poorte van die Godstad nóú oop in alle windrigtings vir enige een om in te kom. Die aanskoulikheid van die Godstad lok alle verlorenes om nader te kom en te keuse te maak om in te kom.
6. Hier is geen sprake van lang lyste vereistes om ‘n inwoner van die stad te word nie.
7. Die engele by die poorte is daar om diegene wat reeds inwoners is, te beskerm.
8. Inwoner van die Godstad, jy kan meer geliefd wees wanneer jy bly sê: “Herbouer in my lewe, dankie vir U puik Gees-werk in my!”

Wenk aan besprekingsleier:

Hierdie week se bespreking bied ideale geleentheid vir elkeen wat stoei met sy eie swakhede en hoe dit ander negatief raak, wees dus baie sensitief in die hantering van die bespreking.

Slotopmerking:

Neem asseblief vrymoedigheid om my op hoogte te hou as die vrae te moeilik of te maklik is.

Doom Charl  (sel 082 469 2499 of landlyn 012 734 1438 of epos charl.bredell@gmail.com)

www.doomcharl.blogspot.com vir die Oordenking, Deo-Diep-Dink en Besprekingsvrae.

Week: 26 Januarie tot 1 Februarie 2014:

 

Besprekingsvrae en antwoorde vir omgeegroepe na aanleiding van die preek op 26 Januarie 2014:

Lees saam:          Openbaring 21: 1 tot 8                                   Tema:   Die Godstad: versier vir Jesus

“Die stad was gereed soos ‘n bruid wat vir haar man versier is.” (Openbaring 21:2b)

Besprekingsvrae:

1. Vertel vir mekaar wie of wat is die Godstad, of nuwe Jerusalem, waarvan ons in Openbaring 21 lees.
2. Lees saam Jesus se eie woorde in Johannes 14:20 en bespreek die toepassing daarvan ten opsigte van die simboliek van die Godstad.
3. Wie of wat is die bruid waarvan ons lees in Openbaring 21: 2 en ander verse?
4. Wanneer vind die bruilof plaas volgens die manier waarop Johannes dit vir ons verduidelik in sy Evangelie?
5. Hoe kan ons die groei en aanpassings in hierdie huweliksverhouding tussen ons en Christus verstaan as daar nog soveel tekortkominge is?
6. Hoe word Jesus-mense versier?
7. Hoekom wil Hy ons versier?
8. Hoe voel God oor die bruid?

Daarom kan elkeen eg en opreg bid: Inwonende Gees, trek my asseblief aan om vir U mooi te lyk.

........................................................................................................................................................................

Moontlike antwoorde:  (slegs vir die oë van die besprekingsleier)

1.  Die Godstad verwys na die plek waar God woon. Vir ons as Jesus-mense woon Hy nie op ‘n ver en vreemde plek nie. Hy is nie onbereikbaar verwyderd in die hoë hemel nie. Nee, God is volledig deur sy Gees woonagtig en werksaam in elke mens wat sy hart vir Jesus oopgemaak het.
2. Jesus het self gesê: “Daardie dag sal julle weet dat Ek in my Vader is en julle in My en Ek in julle.” (Johannes 14:20)  Jý is die Godstad waarin Hy gekies het om in te trek met sy Gees.
3. Die bruid is al die Jesus-mense, dus almal wat aan die kerk van Jesus Christus behoort, almal wat in die Godstad woon.
4. In Johannes se denke het die bruilof reeds plaasgevind, Christus as Bruidegom en die uitverkorenes is reeds verenig, reeds een.
5. Ons as uitverkore Jesus-mense sukkel ongelukkig met die sonde in ons en in ander om ons, maar leef reeds as oorwinnaars met Hom in ons. Die voltooiing en die vervolmaking wag natuurlik eers in die lewe hierna, maar dit is gewaarborg in Hom. En so is Hy in ons besig om ons te versier.
6. “God het haar vergun ... fyn klere (wat) die regverdige dade van die gelowiges is.” (Openbaring 19:8) Alles wat Hy in ons wil verander en ons mee wil help en ons lewens mee wil verryk en van ons beter mense in sy oë maak, neem Hy voor verantwoordelikheid. In onsself kan ons nie goed wees nie, God kan ons nie regverdig verklaar op grond van ons eie goedheid en gehoorsaamheid nie, ons is nie daartoe in staat nie – daarom doen Hy juis heiligmaking in ons, so versier Hý ons!
7. Om die prys wat die Lam, dit is die gekruisigde Jesus, vir elke Jesus-mens se vergifnis en redding betaal het, die moeite werd te maak. Hoor hoe sê Johannes dit: “... ek sal jou die bruid wys, die vrou van die Lam.” (Openbaring 21:9b) Op grond van Jesus se volmaakte opoffering wat steeds voortgaan deur sy inwoning deur die Gees in ons, kom verbind Hy Homself in ‘n ewige liefdesverhouding met elke Jesus-mens.
8. “Soos ‘n bruidegom bly is oor sy bruid, so sal jou God oor jou bly wees.” (Jesaja 62:5b)

Wenk aan besprekingsleier:

Daar is nie altyd net een regte antwoord nie, maar sekere antwoorde is net nader aan die kern van die saak – probeer dat die bespreking bly by die kern van die saak.

Slotopmerking:

Neem asseblief vrymoedigheid om my op hoogte te hou as die vrae te moeilik of te maklik is.

Neem vrymoedigheid om enige onduidelikheid aan my deur te gee.

Week: 20 tot 25 Januarie 2014:

NG Gemeente Premiermyn: Besprekingsvrae en antwoorde vir omgeegroepe na aanleiding van die preek op 19 Januarie 2014: Lees saam: Openbaring 21: 1 tot 8 Tema: Die Godstad: erken die Troon “Toe sê Hy wat op die troon sit: “Kyk, Ek maak alles nuut.”” (Openbaring 21:5a)

Besprekingsvrae:

1. ‘n Nuwe jaar gee geleentheid vir ‘n nuwe begin. Noem vir mekaar moontlikhede van so ‘n nuwe begin in die alledaagse lewe.
2. Hoekom dink julle is dit nodig om as Jesus-mens ook gereeld ‘n nuwe begin te maak?
3. Watter simbool gebruik Johannes in Openbaring 21 om ons verhouding met die Here te beskrywe?
4. Hoekom kies Doom Charl om eerder van die Godstad te praat as van die nuwe Jerusalem?
5. Wat is die belangrikste betekenis van die Godstad?
6. Waar woon God vir ons as Jesus-mense?
7. Waarmee is Hy besig in jou lewe as Hy simbolies sit op die troon van jou hart? 
8. Wat beteken dit dat God jou lewe beheer?
9. Hoe kan jy vir God op die troon van jou hart te verwelkom?
10. Noem praktiese maniere waarop jy God se heerskappy kan “erken” in jou lewe. Moontlike antwoorde: (slegs vir die oë van die besprekingsleier)
1. ‘n Nuwe werk, of nuwe kollegas, of nuwe skooljaar, of nuwe projek, of nuwe huis, of nuwe fase in jou huwelik, of wat ook al vir jou nuut mag wees.
2. In jou geloofsverhouding met God as Jesus-mens, wil Hy ook vir jou nuwe ervaringe en nuwe ontdekkings gee om jou te laat groei.
3. Die beeld van die nuwe Jerusalem, die stad van God, of die Godstad.
4. Omdat Jerusalem vir meeste van ons ‘n ver en vreemde plek is, terwyl “Godstad” dieselfde uiteindelik beteken en ons beter daarmee kan identifiseer.
5. Die Godstad verwys na die plek waar God woon.
6. Vir ons as Jesus-mense woon Hy nie op ‘n ver en vreemde plek nie. Hy is nie onbereikbaar verwyderd in die hoë hemel nie. Nee, God is volledig deur sy Gees woonagtig en werksaam in elke mens wat sy hart vir Jesus oopgemaak het. Jý is die Godstad waarin Hy gekies het om in te trek met sy Gees.
7. Die troon is simbool van heerskappy en in beheer wees.
8. Hy wil jou lewe liefdevol en sonder dwang help beheer. Hy wil jou help met jou gedagtes, keuses, besluite, emosies, verhoudings, behoeftes, en wat jy ook al nodig het. Hy is nie die oorneem-tipe nie, Hy wil net dáár wees vir jou, Hy wil net déél wees van alles in jou lewe. Sy manier van in beheer wees, is gerieflik en met wysheid.
9. Hy wil ‘n nuwe geleentheid vir jou gee om sy heerskappy in jou lewe te “erken”. Daar kan ook baie ander werkwoorde wees naas die woord “erken”, woorde soos “aanvaar”, “oorgee”, “toelaat”, ens. Solank dit nie dwang of ‘n las vir ons beteken nie.
10. Dink gedurig aan Hom; praat soveel as moontlik met Hom; maak tyd in jou lewe vir Hom; soek maniere wat vir jou werk om Hom beter te ken; raak bewus in jou alledaagse dat HY IS! Wenk aan besprekingsleier: Moenie toelaat dat die boek Openbaring vir die groep ‘n probleem is om te verstaan nie, die vrae is eenvoudig opgestel om juis te help om die wonderlike geheimenisse van Openbaring maklik te kan verstaan.

Slotopmerking: Neem asseblief vrymoedigheid om my op hoogte te hou as die vrae te moeilik of te maklik is. Neem vrymoedigheid om enige onduidelikheid aan my deur te gee.

Doom Charl
(sel 082 469 2499 of landlyn 012 734 1438 of epos charl.bredell@gmail.com)